Gründet isch eusi Maskegruppe im Jahr 1994 wordä. Drü begeischtereti Fasnächtler mached sich mit viel Isatz dra ihren Traum zverwürklichä.

Als erschts hät en guete Name für di zuekünftig Maskegruppe anä müesä. Irgendwie simmer uf dä Name "Fälli - Glöggler" cho, dementschprächend händ  mir dänn au euses Gwändli kreiert: schwarzi Hose und Jagge mit viel Fell und enere ganze Palette luschtige Glöggli. Mangels usrichende Nähkenntnis, händ mir eus a euses "Fälli-Omi" gwandt, wo eus d'Hose und d'Jagge gnäet hät. S'Fell und Glöggli händ mir dänn selber anegnäht. Vo Hand - natürlich. I de Afangsjahr hämmer eusi Maske selber gmacht, us Kleischter und Zitige hämmer eusi Narregsichter gformet. Am Schluss hät euse Gründerpräsi dä Fahneentwurf gmacht und euses "Fälli-Omi" hät en den mit viel Fliess gnäht.

1995 sind mir dänn rief gsi für euse erscht Umzug und dä isch en vollä Erfolg wordä.

Eis Jahr spöter hät eus en begnadete Maskeschnitzer us em dütsche Freiburg, schöni Holzmaske gschnitzt. Die würded mir um keis Geld uf derä Wält wieder hergeh. Damit mir s'absolute Pünktli händ chöne erreiche, hämmer d'Maske mit Fell und Fuchsschwänz gschmückt.

Mir nämed a jedem nu erdenklichä Umzug teil: La Chaux-de-Fonds, Euro Karneval und vieles meh. Selbschtverständlich simmer au a dütsche Umzüge zfinde. Da mir en Winterthurer Verein sind freued mir eus jedesmal am grosse Umzug mitzlaufe.

Hüt simmer im Verein öpä 20 Lüt und au für dä Nachwuchs isch gsorget.

Hämmer dis Intresse gweckt, denn meld dich doch bi eusem Präsi.

Copyright(c) 2006 Fälli Glöggler. All Rächt si Eus
LadyGloeggli@faelli-gloeggler.ch